Aumento astronomico di 'schoolgeld'
Otami Thomasia di AVP.
E aumento di costonan di enseñansa pa mayornan, pa scolnan y pa gobierno a bira un problema grandi cu ta rekeri escogencia y decisionnan na tur nivel di enseñansa pa sigura e derecho di cada mucha y ciudadano riba enseñansa di calidad como un derecho humano basico.
E problema di costo di enseñansa ta serio.
“Den e situacion aki Bo lo a spera accionnan proactivo di gobierno pa sigura cu tur mucha ta sigui bay scol. Cu e calidad di enseñansa no ta bay atras y cu mayornan por sigui cuida y alimenta nan yiunan bon. Pero lamentablemente, mescos cu den asina hopi otro asunto importante pa pueblo, e gobierno aki no ta haci nada!” Asina un maestro di scol y alabes mayor a bisa nos. Su reaccion a bini den cuadro di e discusion cu apenas a cuminsa door di e ceramento di scol na San Nicolas y e aumento sin coordinacion di placa di scol. Na algun scol basico e ta bira 350 pa cada mucha e aña aki.
Na MAVO-nan ya e ta 350 of mas. Na EPB tin plan pa aumenta e suma cu cada mucha tin cu paga te na 1600 florin ! Den luz di e desaroyo aki Bo lo spera en berdad cu gobierno lo a prepara un plan, dialoga cu directivanan di scol y propone cambionan den e financiamento pa para e desaroyo preocupante aki. Pero esaki no a sosode. Al contrario. E aña di scol ta yegando su fin y gobierno no a mustra niun iniciativa pa atende cu e problema serio aki!
SOLUCION
Di un gobierno cu ta sinta seis aña y no a presenta niun plan pa atende cu e problema aki, no por spera nada mas. Den seno di partido AVP si a tuma e problema na serio y a cuminsa busca solucion pa e corto y largo plaso.
Pa e grupo di trabou den AVP e solucion na final mester encera un redistribucion di fondonan den e presupuesto, pasobra e problema no ta djis e aumento drastico di “schoolgeld”. E problema ta henter e financiamento di enseñansa cu ta responsabilidad di gobierno di Aruba y ta hancra den nos constitucion. E ta encera e responsabilidad di maneho di directivanan di scol publico y priva. E ta encera e pago husto di maestronan di scol y tur e personal di apoyo di scolnan. Tambe e pago husto di trahadonan di limpiesa (=werksternan) cu gabinete Wever-Croes a priminti di paga, pero seis aña despues te ainda no a paga e trahadonan aki e salario husto cu nan merece.
E financiamento di enseñansa ta encera e financiamento di scolnan preparatorio te na universidad y estudio di yiunan di tera den exterior. E ta un tarea grandi pero no por sinta warda e gobierno aki mas.
E solucion cu e grupo ta busca mester sigura en todo caso cu e derecho di cada mucha pa haya enseñansa ta keda garantisa, cu e trabou di maestro di scol ta keda uno atractivo, financieramente tambe y cu e calidad di enseñansa no ta bay atras. Mester renoba enseñansa.
Mientrastanto mayornan ta haci bon di exigi pa gobierno stop di malgasta placa y pone tur e placa cu nan a haya y ta haya, den asuntonan cu ta na beneficio di pueblo. Cuminsando cu enseñansa, cuido medico y costo di bida. Y no mester warda mas.
Djis aki aña di scol nobo ta cuminsa y si no bini cambio prome cu esey, hopi mucha no lo por bay scol. Pasobra nan mayornan no lo por paga scol pa nan.
Comments