Powerlifting ta logra medayanan grandi den e competencia di nivel mas halto den nos region.

Atletanan representante di ABPA ta logra resultadonan unico den historia den deporte di forza di Aruba

Durante algun dia duro di bataya den un competencia cu un participacion record di mas cu 350+ atleta, e federacion regional di Powerlifting “North American Powerlifting Federation” (NAPF) cu ta regula e deporte pa loke ta trata e region di Norte y Centro America, ademas di ful Caribe, a organisa nan di 19 evento regional; 19th North American Powerlifting Championships, cual a tuma lugar na Panama City, Panama. NAPF ta regula e deporte den e area aki como sector cu ta forma parti di e federacion internacional mas grandi y mas popular di powerlifting na mundo, cu ta e “International Powerlifting Federation”.

E aña aki IPF tambe ta celebra 50 aña di existencia.

Durante e evento aki, dos atleta local den number di Joshua Frias y Corina Boekhoudt a representa nos pais den e disciplina “classic”. Kinan atleta Joshua Frias a gana su categoria, cual ta Junior ( te cu 23 aña) den e -66kg klasse. Ademas di gana oro den un manera hopi impresionante, e ta logra kibra un record regional cu pa shete aña no por a wordo surpasa. Cu un deadlift di 233 kilo, e la logra mehora e marca di e record.

Corina Boekhoudt, un juffrouw di scol MAVO San Antonio y mama di 3 yiu, a logra obtene e medaya di bronze den e categoria masters I (di 40-50 aña di edad) den e -69kg klasse. Ambos atleta a mustra cu e preparacion corecto y disciplina, no obstante e circumstancianan di bida, por train y duna un prestacion na un evento di e nivel aki.

E dos atletanan aki awo ta uni cu Jason Li, como e 3 atletanan cu a logra medaya na e evento aki di nivel mas halto den nos region. Atletanan cu a obtene e logronan aki ta etrena bou di guia di entrenador Jonathan Wever cu tin su club di forza “Paradise Strength Aruba”.

Deporte di forza “powerlifting” a logra haya back su popularidad despues di hopi aña y por bisa cu e grupo di talento cu tin awo sigur lo percura pa nos por sigi hiba nos bandera dilanti den e eventonan aki.

Kier gradici tur sponsor/ donacion cu a yuda haci esaki posibel, comi Ministerio di Ensañansa y Deporte, Century 21 Real Estate, SPIA, Sport Caribe, Sherwin Williams y mucho mas!

#SportZoneAruba