Dialuna Parlamento di Aruba finalmente a trata e peticion pa un reunion publico cu fraccion di AVP
a haci aña pasa; pa ta exacto dia 16 di augustus 2022, pa trata e impacto di aumento drastico di costo di bida. Perdida di poder di compra, riba su mes, no ta un sorpresa, segun Mervin Wyatt-Ras. E ta algo cu tur dia ta nos pueblo ta biba cu ne, esta cu tin menos placa den cartera y no por tira culpa mas riba COVID of guera na Ucrania.
Aumento di prijs di cuminda y otro articulo di prome necesidad, fuera di e tarifa di awa, coriente,
gas y gasolin caminda ta corta meter di awa y coriente di esunnan humilde, mientras cu entrante
prome di october tin cu paga pa remedi door di recorte den cuido medico.
Minister President Evelyn Wever-Croes cu sosten di Minister Dangui Oduber a firma e
Landenpakket, cual ta encera palabracion cu Hulanda pa tuma medida riba diferente tereno.
Introduccion di BTW cu a suspende despues, aumento di BBO te 7%, recorte den cuido medico cu
5.5% mensual for di dokter, specialista y otro dunado di cuido. E ultimo aki tin como consecuencia
cu varios specialista ta bandona e isla pa traha na otro pais.
A tuma tur medida sin ofrece ningun pakete di asistencia of vangnet social pa yuda esunnan mas
vulnerabel den nos sociedad, specialmente nos grandi y esunnan di entrada mas abou, por ehempel mama soltero. Klassezorg a haci su entrada, loke ta contrario na e mision di AZV pa yuda tur hende igual.
Segun gobierno, e ciudadano mester pone placa un banda pa paga pa su remedi.
Parlamentario Wyatt-Ras ta puntra ta con por pretende cu esunnan cu no tin ni placa pa alimenta
nan mes y nan yiunan bay pone placa un banda pa paga medicina, Wyatt-Ras ta puntra.
Mescos a corta den Stichting SABA door di cual nan no por paga nan empleado debidamente.
Respaldo, cu awor eroneamente ta cay bou ministerio di husticia, tambe a manda cliente cas,
mientras ta conoci cu e cantidad di persona cu tin dificultad mental a aumenta durante ultimo
añanan. Di otro banda gobierno ta coopera y corta cinta pa habri practica priva cu ta duna mesun cuido cu hospital pa esunnan cu si por paga pa haya cuido; atrobe contribuyendo na klassezorg.
Contrario na e subida di costo di bida y inflacion, e entrada di nos ciudadanonan no a subi. Segun Centraal Bureau Statistiek, e minimo cu mester pa biba a baha drasticamente desde aña 2017. Cifra di CBS di 2022 compara cu december 2017 ta mustra cu e minimo pa un persona pa luna a aumenta cu practicamente 400 Florin desde 2017. E bestaansminimum pa 4 persona, 2 adulto y 2 mucha a aumenta na 2022 cu practicamente 700 florin pa luna desde 2017.
Tur esaki ta ocasiona pobresa grandi den nos pais y tin impacto alabes riba problemanan social y
tambe riba salud mental di nos ciudadanonan. Por bisa cu costo di bida haltisimo tin su impacto
negativo riba poder di compra cu a baha drastico y tambe riba desaroyo social y salud mental di nos pueblo.
Wyatt-Ras a trece dilanti cu un persona cu tin problema financiero tin hopi preocupacion pa su
presente, su sobrevivencia y su futuro. Esey ta influencia su balor propio of autoestima, lag’e sinti
impotencia y ta trece cu ne depresion of otro condicion psicologico. E por hiba un hende n adiccion of violencia relacional y asina e problemanan ta keda escala. Pa mucha, e ambiente instabil aki por ocasiona cu ta busca distraccion riba caya, cu tur su peliger. Ni sikiera e canchanan pa haci deporte cerca di cas nan por uza paso mayoria e gobierno sin curason aki a laga bay perdi.
Ademas a corta den e cantidad di trahado social cu tabatin na scol pa detecta problema trempan. E 36 miyon cu Parlamento a aproba pa inverti den hubentud a bay den huur di edificionan pa acomoda departamento caminda famia y compinchi ta traha. Mientrastanto gobierno ta sigui tuma medida pa hinca mas den nan cartera y sigui djodjo cu placa di pueblo. Gobierno ta keda cumpra auto di luho, biaha rond mundo. Hasta CAft ta indica cu gobierno ta paga mas y mas pa experto y abogadonan, mientras e homber y muhe humilde tin cu lucha cu un entrada cu no ta yega ni pa come drechi.
Wyatt-Ras a menciona cu den e relato y cuenta anual di AZV ta mira cu, door di adelanto den
turismo, tin entrada di 26.7 miyon mas di loke a proyecta. AZV por a haci inversion di 9 miyon riba diferente tereno. Na final di aña tabatin hasta crecemento extra di entrada di 1.5% di BAZV cu ta paga door di esunnan cu ta traha. P’esey e parlamentario ta puntra dicon no alivia e necesidad di pueblo pa remedi, door di elimina e lista di remedi cu mester paga p’e y ki dia lo paga dokter y specialista completo bek?
Wyatt-Ras kier sa con gobierno con lo yuda y sostene nos pueblo, con nos hendenan cu a perde cas por haya yudansa concreto pa yega bek na nan propio vivienda y unda nan mester bay pa haya e ayudo aki? Ken ta bay yuda nos ciudadano sali di debe? Unda nan por acudi of yama? Con lo mehora entrada di e ciudadano pa por cumpli cu su gastonan? Ki pakete di incentivo lo tin pa nos ciudadano? Ki dia lo elimina e medidanan den cuido; tanto e positieve lijst; como e medida di 5.5%? Con ta bay atende cu problema di pobresa? Con ta bay baha prijs di producto pa nos ciudadano por cumpra nan comestibel? Kico lo haci pa yuda mayor cu salario minimo paga schoolgeld y airco geld y pa cumpra paña pa bay scol? Con lo atende cu nos grandi, mama soltero y esunnan di salario minimo cu no por paga pa nan medicina? Unda nos ciudadano cu problema psicologico por bay pa haya yudansa? Unda nan por yama y di kico e yudansa aki ta consisti? Ki dia ta duna esunnan cu limitacion bou 16 aña un sosten financiero?
Otro pregunta cu e parlamentario di fraccion di AVP a haci ta con ta bay logra miho tarifa for di
hospital di Colombia? Miho proceso di manda pashent exterior manera test y menos largo?
Kico a haci te cu awor pa cumpra remedi na tarifa mas abou? Con a bay cu esaki? Con a bay cu cooperacion entre hospital cu ImSan? Con a bay cu e proceso di ampliacion di eerste lijn zorg y prevencion? Kico a para di acreditacion di ImSan pa introduci turismo medico?
Pueblo kier scucha awor kico gobierno ta bay haci pa mehora entrada di nos ciudadano y no kier
storia bunita, asina Wyatt-Ras a sigura. Sinembargo mayoria minister, y specialmente minister
presidente, a keda tira culpa riba AVP y riba Mike Eman. Casi por a pensa cu ta AVP ta
gobernando. Hecho ta keda cu medida lo keda asota nos pais y cu e gobierno aki no ta carga
responsabilidad y na un manera falso ta keda tira culpa riba otro. Minister bou nivel a keda tira lodo riba miembro di AVP y no kier mira cu ta Evelyn Wever-Croes a core bay Hulanda firma
Landspakket y hinca nos pueblo den pobresa cu tur medida descabeya sin kier baha gastonan
operacional di gobierno.
Comments