𝐆𝐫𝐨𝐮𝐧𝐝𝐛𝐫𝐞𝐚𝐤𝐢𝐧𝐠 𝐩𝐚 𝐞 𝐨𝐯𝐞𝐫𝐝𝐞𝐤𝐭𝐞 𝐝𝐢 𝐈𝐁𝐈𝐒𝐀 𝐒𝐩𝐨𝐫𝐭𝐜𝐞𝐧𝐭𝐫𝐮𝐦 𝐒𝐚𝐧 𝐍𝐢𝐜𝐨𝐥𝐚𝐬

Parlamentario Endy Croes a representa Gabinete Wever - Croes II diabierna atardi na IBISA Sportcentrum San Nicolas na un ocasion hopi special. Oficialmente a tuma luga e groundbreaking, cual ta duna inicio na un proyecto magnifico, esta instalacion di un dak grandi y moderno “overdekte speelplaats” di 25 meter largo pa 17 meter hancho y 9 meter di haltura.

𝗛𝗶𝘀𝘁𝗼𝗿𝗶𝗮 𝗰𝗼𝗿𝘁𝗶𝗰𝗼 𝗱𝗶 𝗜𝗕𝗜𝗦𝗔 𝗦𝗽𝗼𝗿𝘁𝗰𝗲𝗻𝘁𝗿𝘂𝗺

Jessy Beukenboom a hiba un speech y a conta poco di e historia di IBISA San Nicolas, unda e mes a inica como empleado despues cu el a gradua na Merca na aña 1982. Tambe tabatin varios invitado special presente entre nan: empleado- y pensionadonan cu a traha nan bida na IBISA Sportcentrum San Nicolas manera: Sr. Bill Buckley, Sr. Willy Willems, Sr. Kenneth Carty, Sr. Erick Mohamed y Sr. Jones cu ainda ta activo pa celebra e “milestone” aki, unda cu lo construi un dak grandi riba e speelplaats pafo. IBISA Sportcentrum San Nicolas tin un historia largo, unda miles di hoben te na grandi ta haci uzo di e facilidad aki. Director actual Sr. Juni Faro den su speech a splica cu como mucha e tabata sali di Noord bin train “weightlifting” eynan y cu e luga tin un parti hopi sentimental p’e pa cu su carera deportivo. Sr. Faro a yega di representa Aruba na dos (2) ocasion den Weganan Olimpico na Atlanta y Athenas den “weightlifting”.

𝗣𝗮𝗿𝗹𝗮𝗺𝗲𝗻𝘁𝗮𝗿𝗶𝗼 𝗘𝗻𝗱𝘆 𝗖𝗿𝗼𝗲𝘀 𝗮 𝗮𝗺𝗽𝗹𝗶𝗮

Parlamentario Endy Croes a hiba palabra den nomber di Gabinete Wever - Croes II y den nomber di Minister actual di Deporte Dangui Oduber. El a splica cu desde final di aña 2022, e mes como Minister encarga cu deporte y IBISA e tempo ey a haci un bishita oficial na Sportcentrum San Nicolas un mainta y a topa alrededor di 50 adulto mayor ta entrenando pafo riba e speelplaats aki den higra di solo. Esaki ta e programa di IBISA “Grandinan Activo”. Den combersacion cu nan a puntra nan kico ta nan deseo. Tur a contesta un dak “overdekte” pa IBISA Sportcentrum San Nicolas pa trece sombra y alivio pa nan por practica cu mas smaak. Mesun momento Endy a duna su compromiso. Den su speech el a splica cu algun a bise e dia ey cu nan a wordo gaña door di varios minister anterior y pesey nan lo keda cu duda. Endy Croes a sigura nan na 2022 cu kico cu e priminti e ta percura pa cumpli. Mesora a traha riba e plan den aña 2023 pa aloca e placa den presupuesto 2024. Na maart 2024, a haci e compra di ful e dak, cual a yega Aruba na luna di september 2024. Lamentablemente, Endy a wordo baha como minister den october 2024 kisas no na e manera mas husto, pero esey no a cambia su vision pa cumpli cu su promesa.

Ta gradici Dangui Oduber cu a lage (awe) Parlamentario Endy Croes trek e proyecto aki te final. E “bouwvergunning” tambe a dura casi 6 luna, pero awor tur cos ta na ordo, e “bouwvergunning” a sali, e compania KSR tambe ta cla pa cuminsa mesora. Aki 3 luna rond fin di juli, e gobierno nobo por celebra e apertura oficial di e bunita proyecto aki. Miles di hoben di bario y bisindario, pero tambe Colegio Nigel Matthew y mas scolnan den cercania lo bay haci uzo mas aun awor di e facilidad aki. A splica cu a haci peticion oficial na DEHZI pa e di dos (2) overdekte pa e parti pabou na IBISA Sportcentrum San Nicolas, cual lo wordo trata e aña aki y ta spera cu e gobierno nobo sigui cu e fase dos (2) aki. Adhunto ta publica e rapport y peticion oficial cu a bay DEHZI. Danki na tur cu a coopera fenomenal den e trayecto aki pa por a logra e proyecto aki. Pabien IBISA Sportcentrum, Pabien San Nicolas y Pabien Aruba. Nos a cumpli!